Halil Shabani bën Zbulim të ri Arkeologjik në Konispol: Kisha e Psarit

Një zbulim i rrallë arkeologjik ka dalë në dritë në Konispol, falë kërkimeve dhe pasionit të studiuesit Halil Shabani. Ai ka identifikuar vendndodhjen e Kishës së Psarit, një toponim i njohur prej kohësh në zonë, por që deri më sot ishte mbuluar nga bimësia e dendur dhe mungesa e studimeve të thelluara.

Sipas Shabanit, Kisha e Psarit ka qenë e njohur në kujtesën e banorëve të Konispolit si emërtim, por pa ndonjë informacion konkret për objektin që fshihej pas saj. Vetëm pas pastrimit të zonës dhe vëzhgimeve në terren, janë zbuluar gjurmë të qarta të një ndërtese të vjetër me karakter kishtar. “Bimësia e dendur nuk e lejonte të shfaqej qartë struktura, por tani kemi prova se në këtë vend ka ekzistuar një kishë me rëndësi historike”, – thekson Halil Shabani.

Halil Shabani: Kisha e Psarit një Ndërtim nbi një Objekt më të Hershëm

Ajo që e bën zbulimin edhe më interesant është fakti se kisha është ngritur mbi një strukturë më të lashtë, me përmasa mbresëlënëse prej 16.5 x 9 metrash, e ndërtuar me blloqe të mëdha guri, tipike për periudhat antike. Kjo tregon se vendi ka pasur funksion qendror në jetën fetare apo shoqërore të komuniteteve të hershme të Konispolit.

Sipas vlerësimeve paraprake, struktura më e vjetër mund të ketë qenë një vilë e pasur ose një tempull pagan, i cili më vonë është përshtatur si objekt i kultit të krishterë.

Gjurmët e Shekullit II para Krishtit

Në rrënojat e objektit janë gjetur fragmente qeramike që datojnë në shekullin e dytë para Krishtit, një tregues i qartë i vazhdimësisë së jetës në këtë territor për mijëvjeçarë me radhë. Këto artefakte, sipas Shabanit, dëshmojnë për një prani të hershme urbane dhe kulturore në jugun ekstrem të Shqipërisë, në një zonë që shpesh ka mbetur jashtë vëmendjes së studimeve arkeologjike.

Nevoja për Studim dhe Mbrojtje

Halil Shabani apelon që ky zbulim të mos mbetet vetëm një kuriozitet lokal. “Objekti meriton vëmendje të veçantë dhe një studim të thelluar shkencor, për të kuptuar më mirë periudhat ndërtimore dhe përdorimin e tij ndër shekuj”, – thekson ai. Një ndërhyrje profesionale do të mundësonte dokumentimin, konservimin dhe promovimin e këtij thesari kulturor si pjesë e trashëgimisë historike të Konispolit.

Një Pasuri që Pret të Rrëfejë Historinë e Saj

Kisha e Psarit, me rrënjët e saj mbi një ndërtim më të lashtë se vetë krishterimi, është një dëshmi e gjallë e bashkëjetesës së kulturave dhe besimeve që kanë kaluar nëpër këtë truall. Ajo vjen si kujtesë se nën çdo pëllëmbë të tokës së Konispolit mund të fshihet një faqe e pazbuluar e historisë shqiptare.

Website Saranda Web

Facebook Saranda Web

Instagram saranda.web

Youtube sarandaweb

Tiktok saranda.web

Pinterest sarandaweb

in sarandaweb