Saranda Web zbulon kush i kafshoi lekët e qenve

Sulmi i qenve të rrugës ndaj një zyrtari të Bashkisë Sarandë, ndodhur mëngjesin e sotëm, ka ngjallur reagime të shumta nga opinioni qytetar për këtë problem mjaft shqetësues në Sarandë. Por midis komenteve ironike  dhe atyre që përcillnin përjetime të ngjashme, ka patur edhe një koment që vinte në dyshim faktin e tenderit për prej 3.3 milionë lekësh zhvilluar nga ana e Bashkisë Sarandë për atë që titullohet “Shpenzime për përkujdesjen e kafshëve të rrugës (sterilizim,vaksinim dhe matrikulim i qenve endacak meshkuj)
Saranda Web, si kurdoherë, po përgjigjet me fakte:
Ky tender, që nga e Bashkisë konsiderohet Blerje mallrash me vlerë të vogël, është shpallur në datën 30 mars 2018.
Data e mbajtjes së tenderit ka qenë në 03 prill 2018 dhe data e shpalljes së fituesit ka qenë 06 prill 2018, pra gjithcka ka ndodhur brenda 1 jave.
Nga ana e Bashkisë Sarandë në datën 6 prill 2018 është bërë shpallja e fituesit të këtij tenderi, i cili sipas dokumentave që disponon Saranda Web rezulton se Operator Ekonomik Kontraktues ka qenë Orgesa Beqari.
Ne nuk mund të dimë se cfarë ka ndodhur me realizimin e kësaj “blerje në shuma të vogla”, por dyshimet tona janë se lekët e qenve të rrugëve në Sarandë janë kafshuar, dyshime të cilat i bazojmë në faktin se deri më sot nuk është parë nëpër rrugët e Sarandës asnjë qen endacak i matrikulluar.