Mesazh i kandidates së Nisma Thurrje Anduela Ismaili

.
Unë jam Anduela Ismaili, vajzë sarandjote e shkolluar për Drejtësi në Universitetin e Trentos, Itali. Në gjak kam kulturën e punës dhe ambicien për t’u rritur si njeri dhe si profesioniste. Këto vlera të marra në familjen time dhe shoqërinë e Sarandës, kanë qenë udhërrëfyese të miat në 16 vitet e jetuara midis Italisë dhe Anglisë.
Në karierën time kam menaxhuar projekte zhvillimi dhe teknologjike për kompani serioze si Google dhe Oracle. Kam punuar në epiqendrën e financës City of London dhe kam qenë konsulente biznesi e disa kompanive në Mbretërinë e Bashkuar.

Sot ndiej peshën e padrejtësisë që i bëhet çdo shqiptari. Të mirat tona publike plaçkiten ose merren peng nga një grusht njerëzish të paskrupullt e të pangopur. Meritojmë më mirë!
Mirëmenaxhimi i resurseve në shërbim të qytetarëve do të sjellë rritjen e standardit të jetesës për të gjithë.

Si sipërmarrëse kam investuar suksesshëm të ardhurat e mia prej mëse një dekade. Me të njëjtin përkushtim dua ti shërbejë të mirës kombëtare shqiptare.

Dëshiroj të përfaqësoj Sarandën në Kuvendin e Shqipërisë si deputete e Nismës Thurje, forca me energjinë më të re politike, e ardhmja e Shqipërisë dhe shqiptarëve.

Votoni për partitë e vogla: është shansi ynë i vetëm për të përmbysur pengmarrësit e këtij vendi.