7 Milionë Euro dështim: Edhe Parku Miqësia mbetet një parking makinash – VIDEO

15 Janar 2025 13:07

7 Milionë Euro dështim: Edhe Parku Miqësia mbetet një parking makinash!

Parku Miqësia në Sarandë, një nga hapsirat më të rëndësishme publike të qytetit, vazhdon të mbetet i mbyllur për fëmijët dhe komunitetin, pavarësisht se punimet për rehabilitimin e tij filluan plot 20 muaj më parë. Sipas projektit fillestar, ky investim, pjesë e programit “Integrimi Urban i Sarandës,” kishte si synim kthimin e parkut në një qendër moderne dhe funksionale për të gjitha moshat. Por realiteti është krejtësisht ndryshe.

Afati i përfundimit të punimeve ishte caktuar 9 muaj më parë, por deri më sot asgjë nuk ka ndryshuar. Parku Miqësia nuk vetëm që nuk ka rifituar funksionin e tij si hapsirë e gjelbër dhe e sigurtë për fëmijët, por është shndërruar në një parking automjetesh, duke shtuar kaosin urbanistik dhe duke zhgënjyer pritshmëritë e banorëve.

Investimi prej 7 milionë eurosh, që mban një emër aq premtues, duket se nuk ka sjellë asnjë përfitim konkret për qytetin. Rrugët me mozaikë, pjesë e të njëjtit projekt, janë kthyer në një problem të përditshëm. Dëmtimet e shpeshta dhe riparimet që bëhen pothuajse çdo 2-3 javë tregojnë qartë se cilësia e punimeve ka qenë larg standardeve të pritura.

Banorët e Sarandës janë të indinjuar me situatën dhe e konsiderojnë këtë projekt si një shembull flagrant të keqmenaxhimit të fondeve publike.

Mungesa e transparencës dhe heshtja e institucioneve përgjegjëse vetëm sa e thellojnë krizën e besimit mes qytetarëve dhe autoriteteve. Banorët kërkojnë një reagim të menjëhershëm nga pushteti vendor dhe një plan konkret për të rikthyer parkun në funksion të komunitetit.