Zjarri te Syri i Kaltër, situata alarmante – flakët përparojnë me shpejtësi, vizitorët evakuohen

11 Gusht 2025 19:48 Nga Saranda Web

Situata në Parkun Natyror të “Syrit të Kaltër” ka marrë përmasa alarmante, ndërsa flakët po përhapen me shpejtësi të madhe për shkak të erës së fortë dhe temperaturave të larta. Të gjithë vizitorët janë evakuuar, ndërsa një helikopter i forcave të armatosura ka ndërhyrë nga ajri. Për shkak të dendësisë së bimësisë dhe terrenit të vështirë, depërtimi i forcave tokësore mbetet i kufizuar.

Zjarri te Syri i Kaltër, situata alarmante

Nënprefekti i Sarandës, Kristaq Kiço, i cili ndodhej në vendngjarje, deklaroi se kjo është hera e parë që Parku përfshihet nga një situatë e tillë. Ai theksoi se ndërhyrja nga ajri pritet të përforcohet me avionë ‘Canadair’.

“Situatë e pafavorshme edhe për shkak të erës. Situatë e papërjetuar edhe më parë, e shihni edhe vetë forcën e saj, teksa edhe flakët fluturojnë deri në distancë 200 metra nga forca e erës. Personalisht nuk e kam përjetuar ndonjëherë. Jemi përqendruar në fshatin Krongj me forca të dislokuara, si dhe sot me helikopter të forcave të armatosura. Por edhe pse u mendua se u shua, vatrat u riaktivizuan, situata mbetet problematike. Parku i Syrit të Kaltër nuk mbaj mend të jetë përfshirë ndonjëherë nga flakët në këto përmasa,” tha Kiço.

Për planin operacional, nënprefekti shtoi se terreni i dendur nuk lejon operacionin tokësor në shkallë të plotë dhe se aktualisht janë të pranishëm disa vatra të shpërndara në një perimetër prej rreth 50 kilometrash, përfshirë edhe zonën e Mesopotamit.

“Deri tani ka operuar një helikopter dhe jemi në pritje të avionëve ‘Canadair’ që i presim nga çasti në çast. Problemi është se janë disa vatra zjarri, madje ka edhe nga ato që riaktivizohen. Duhet treguar kujdes maksimal, jemi në terren 24 orë, por kushtet atmosferike, era dhe temperaturat e larta i kemi në disfavor,” përfundoi ai.

Ndërkohë, autoritetet u bëjnë thirrje banorëve dhe vizitorëve të shmangin çdo veprim që mund të rrezikojë ndezjen e zjarreve të reja, pasi situata mbetet tepër e brishtë dhe në varësi të kushteve të motit mund të përkeqësohet më tej.