Dita e shtatë e zjarreve në Finiq: Dhjetëra shtëpi, mijëra ullinj dhe vreshta të djegura
Prej shtatë ditësh, Bashkia Finiq po përjeton një nga katastrofat më të rënda natyrore të viteve të fundit, teksa zjarret e fuqishme vazhdojnë të përfshijnë zona të gjera, duke lënë pas një panoramë shkatërrimi të plotë.
Sipas një përllogaritje të kryer nga Saranda Web, flakët kanë përshkuar një perimetër prej rreth 55 kilometrash dhe kanë djegur një sipërfaqe të gjerë prej rreth 100 kilometrash katrorë.
Bilanci i dëmeve
- Dhjetëra shtëpi janë shkatërruar plotësisht ose pjesërisht.
- Janë djegur qindra mijëra rrënjë ullinj, shumë prej të cilave të mbjella prej dekadash.
- Janë shkatërruar pemë frutore dhe vreshta me hardhi, duke dëmtuar rëndë ekonominë bujqësore të zonës.
Fshatrat e prekur
Flakët kanë përfshirë dhe rrezikuar seriozisht fshatrat:
Dhivër, Kularat, Cerkovicë, Shën Ndre, Janicat, Leshnicë, Navaricë, Kronj, Krane, Fitore dhe Velahovë.
Në shumë prej këtyre zonave, ndërhyrjet kanë shpëtuar shtëpi e prona të tjera, por dëmet mbi tokën bujqësore, vreshta, pyje dhe mjedis janë të konsiderueshme.
Forcat zjarrfikëse, emergjenca civile dhe banorët po punojnë pa ndërprerje për të izoluar vatrat. Ndërhyrja është vështirësuar nga terreni i thyer, temperaturat e larta dhe era e fortë që e përhap zjarrin me shpejtësi. Pavarësisht ndërhyrjeve ajrore me avionë dhe helikopterë, situata ende nuk po vihet nën kontroll.
Rikuperimi do të kërkojë vite. Ullishtet dhe vreshtat e djegura nuk mund të zëvendësohen shpejt, ndërsa humbja e pemëve frutore do të ndikojë në prodhimin dhe të ardhurat e familjeve. Plaga mjedisore do të ndihet për shumë kohë, duke ndryshuar ekosistemin dhe peizazhin e Finiqit.
Website Saranda Web
Facebook Saranda Web
Instagram saranda.web
Youtube sarandaweb
Tiktok saranda.web
Pinterest sarandaweb
in sarandaweb
