Vidhen 2 mln lekë në Sopik, policia nuk e raporton ngjarjen

Një vjedhje banese është regjistruar mbrëmjen e djeshme në fshatin Sopik, Bashkia Finiq.
Sipas kryefamiljarit, vjedhja ka ndodhur rreth orën 19:00, në kohën kur në shtëpi nuk ka patur asnjë prej familjarëve.
Ai është shprehur për Saranda Web se e ka konstatuar vjedhjen rreth orës 21:00,   pasi janë kthyer në shtëpi dhe kanë parë dhomat dhe plackat e shtëpisë të kthyera përmbys.
Menjëherë ai ka shkuar te vendi ku kishte të fshehura një shumë prej 2 milionë e 60 mijë lekë të vjetra dhe ka konstatuar se paratë ishin vjedhur.
Më pas ka lajmëruar policinë, nga e cila morën përgjigje se policia nuk mund të shkonte në ato caste, por në mëngjes.
Dyshimet e familjarëve, të cilat ja kanë përcjellë edhe policisë, janë se vjedhja është kryer nga ndonjë banor i fshatit, i cili ka parë largimin e familjarëve nga shtëpia dhe ka hyrë për të realizuar vjedhjen.
Ndryshe nga ngjarjet e tjera  të ndonjë arrestimi për vjedhjen e ndonjë hekurishteje, policia nuk e ka raportuar vjedhjen e kësaj shume të konsiderueshme në Sopik.