Pershendetje Saranda Web
Kjo eshte gjendja e Tregut te Fruta Perimeve ne Sarande.
Publikojeni ju lutem, – shkruan tregtari në denoncimin e tij dërguar në Saranda Web
Pas dhjetëra e qindra premtimesh nga Bashkia, Tregu Industrial në Sarandë, vazhdon ende sot të mbahet në këmbë duke pritur përmbushjen e përmirësimit të kushteve të punës.
Tregtarët, jo rrallë herë kanë shprehur shqetësimet e tyre lidhur me problemet që ata hasin me kushtet e vështira aty. Gjatë të nxehtit të verës, atyre iu desh sic do herë të duronin vapën përcëlluese nën llamarina, pluhurin e ngritur nga sheshi i dërrmuar vende vende e tani përsëri, me ardhjen e dimrit, i ftohti dhe shirat e vështirësojnë akoma më tepër të punuarin me orë të gjata nën llamarinat që fusin ujë pikë pikë dhe poshtë mushamave që herë pas here i merr era. Problemi më i madh shoqërues e më shqetësuesi për tregtarët e tregut, është mungesa e tualeteve. Ata ende jetojnë me kushtet si në mesjetë.
Edhe pse detyrimet paguhen te Bashkia rregullisht, përsëri nga ky institucion nuk po merret ende asnjë masë për të plotësuar qoftë edhe kërkesën më minimale për pajisjen me tualete. Thirrjet që ata bëjnë, lidhur me këto probleme përplasen vetëm me premtimet boshe të institucioneve. E njëjta situatë e pashpresë qëndron edhe tek Tregu i Fruta-Perimeve. Tregtarët aty vazhdojnë gjithashtu të punojnë në kushte të vështira, ku uji futet në të gjitha anët dhe nuk rrezikohet vetëm kalbja e perimeve, por sidomos edhe siguria e shëndetit të tyre.
Duke ngulmuar që zëri i tyre të dëgjohet përmes thirrjeve që kanë bërë në redaksinë e Saranda Web, pritet dhe kërkohet reagimi dhe ndërhyrja e institucioneve përkatëse për të zgjidhur apo lehtësuar problematikat e tyre.
