Policia e Sarandës Operacion ndaj një ambulanti për të shpëtuar reputacionin që fundoset
Policia e Sarandës, një institucion që duhet të jetë garantues i rendit dhe sigurisë publike, ndodhet sot në njërën nga ditët më të errëta të reputacionit të saj. Pas përfshirjes së disa efektivëve në një incident të rëndë, ku u përdorën armët e shërbimit në një sherr banal, pritej që struktura e rendit të reagonte me masa të forta për të rikthyer besimin e qytetarëve. Por, fatkeqësisht, veprimet e fundit tregojnë një vizion të mbrapshtë dhe një mungesë të theksuar prioritetesh.
Në vend që të përqendrohen në luftën kundër kriminalitetit, ndërtimeve pa leje, menaxhimit të trafikut dhe problematikave reale që rëndojnë mbi jetën e qytetarëve, policia orkestroi një “super operacion” ndaj një ambulanti. Ky individ, një fukara që mundohej të fitonte bukën e gojës duke shitur orë, telefona dhe kasa telefonash prej vitesh në një rrugë të Sarandës, u bë shënjestra kryesore e forcave të rendit. Aksioni ishte aq i zhurmshëm dhe u shpërnda në të gjitha mediat, sa të linte përshtypjen se kishte të bënte me kapjen e një elementi të rrezikshëm kriminal, mbi të cilin ngarkuan 5 akuza të rënda.
Por a është kjo ajo çfarë qyteti dhe qytetarët presin nga Policia e Sarandës? Sigurisht që jo. Ky veprim është një shpërfaqje e qartë e krizës së prioriteteve dhe një reflektim i paaftësisë për të adresuar problemet e mëdha që prekin shoqërinë.
Në rrjetet sociale, qytetarët kanë reaguar me zemërim të thellë ndaj këtij aksioni, duke e konsideruar një sulm ndaj më të dobëtëve dhe një përpjekje për të tërhequr vëmendjen nga problemet e mëdha që ka policia.
Vetëm përmes veprimeve konkrete dhe një ndryshimi të thellë në qasjen ndaj qytetarëve, Policia e Sarandës mund të fillojë procesin e gjatë të rikthimit të besimit të humbur.
Website Saranda Web
Facebook Saranda Web
Instagram saranda.web
Youtube sarandaweb
Tiktok saranda.web
Pinterest sarandaweb
in sarandaweb
