PD nis përgatitjet për primaret: Krerët e degëve duhet të dorëhiqen nëse synojnë të kandidojnë
Procesi i primareve në Partinë Demokratike, që synon përzgjedhjen e kandidatëve për deputetë në zgjedhjet e ardhshme të 11 majit, duket se më në fund po merr formë. Një mesazh zyrtar i dërguar këtë të enjte krerëve të degëve të PD, njofton nisjen e afërt të primareve dhe përcakton hapat e parë për ata që duan të përfshihen në këtë proces elektoral.
Mesazhi u bën thirrje drejtuesve lokalë që, nëse kanë vendosur të kandidojnë, të japin dorëheqjen nga pozicionet e tyre brenda datës 26 janar 2025. Ky hap i parë është i detyrueshëm për të siguruar një proces të drejtë dhe transparent, ku kandidatët përfshihen në rrethin e konkurrencës elektorale me barazi të plotë.
“Nëse keni vendosur të garoni në primare, brenda ditës së diel, datë 26 janar 2025, duhet të depozitoni dorëheqjen tuaj nga pozicioni i kryetarit të degës pranë Sekretariatit të Organizimit,” thuhet në njoftim.
Ky proces pritet të jetë një test i rëndësishëm për Partinë Demokratike, në përpjekjet e saj për të konsoliduar demokracinë e brendshme dhe për të rikthyer besimin e elektoratit. Primaret jo vetëm që do të përcaktojnë kandidatët për deputetë, por edhe do të jenë një tregues i qartë i gjendjes organizative dhe të ardhmes politike të partisë.
