Sarandë – Mbërrijnë përfaqësues të Ministrisë së Brendshme dhe drejtues të Policisë së Vlorës në një mbledhje urgjente: RENEA, FNSH dhe “Shqiponjat” në operacion të zgjeruar në Sarandë e Ksamil
Situata e rendit dhe sigurisë në Sarandë dhe Ksamil ka sjellë reagim të menjëhershëm nga instancat më të larta të rendit. Përfaqësues të Ministrisë së Brendshme dhe drejtues të lartë të Drejtorisë Vendore të Policisë Vlorë kanë mbërritur këtë të hënë në Komisariatin e Sarandës, ku janë zhvilluar takime urgjente me drejtuesit vendorë të policisë.
Në fokus të mbledhjes ka qenë analiza e ngjarjeve të fundit që kanë shqetësuar qytetarët, bizneset dhe pushuesit, duke i vënë në pikëpyetje garantimin e rendit, sigurisë publike dhe imazhit turistik të zonës në kulmin e sezonit veror.
Ndërkohë, gjatë orëve të para të mëngjesit, forcat RENEA në bashkëpunim me Forcat e Ndërhyrjes së Shpejtë (FNSH) dhe repartin “Shqiponja” kanë zhvilluar një operacion të gjerë kontrolli, si në tokë ashtu edhe nga deti. Burime bëjnë me dije se janë kontrolluar zona të thella malore, tunele dhe bunkerë të braktisur në përpjekje për të kapur elementë të dyshuar, por deri tani pa rezultat konkret.
Operacioni vijon ende në këto momente me intensitet të lartë, ndërsa autoritetet nuk kanë dhënë ende detaje zyrtare mbi objektivin e këtyre kontrolleve.
Nga ana tjetër, qytetarë, përfaqësues të bizneseve dhe pushues i bëjnë thirrje institucioneve ligjzbatuese që të vendosin përpara drejtësisë çdo person përgjegjës për ngjarjet që kanë cenuar sigurinë dhe klimën turistike në zonë, duke kërkuar shmangien e çdo incidenti që mund të dëmtojë imazhin e Sarandës si një destinacion i sigurt dhe i qetë për vizitorët vendas dhe të huaj.
Website Saranda Web
Facebook Saranda Web
Instagram saranda.web
Youtube sarandaweb
Tiktok saranda.web
Pinterest sarandaweb
in sarandaweb
