Z. Kryeministër!
Ju kemi ndjekur në qëndrimin dhe aksionin tuaj për pastrimin e territorit nga mbeturinat. Nismë e vonuar, por e domosdoshme.
Duke dashur t’i shërbejmë interesit publik dhe t’ju vijmë në ndihmë për t’i kërkuar llogari pushtetit vendor po ju njoftojmë publikisht me gjendjen në zonën e Sarandës, Delvinës dhe Finiqit.
Ndotja është masive si në tokë dhe në det. Lumenjtë Kalasë dhe Bistricë derdhin në Gjirin e Sarandës tonelata mbetjesh çdo vit. Në fakt nuk është detyrë juaja, është detyrë e jona si qytetar të mos ndotim dhe e pushtetit vendor të marrë masa ndaj ndotësve dhe të sigurojë infrastrukturën e nevojshme për grumbullimin dhe përpunimin e mbetjeve, por nga sa duket ne kemi dështuar, pasi gjendja në luginat e dy lumenjve Kalasë dhe Bistricë çdo vit është e tillë.
Saranda nuk është veç e jona. Është pasuri e Shtetit Shqiptar. Pasuria më e madhe e Shqipërisë është deti.
Burimi më i madh ekonomik i Sarandës dhe zonave për rreth është deti.
Pikërisht pasurinë tonë më të madhe ne e trajtojmë kaq keq.
Na duhet ndihmë.
Ndihmë që ta pastrojmë dhe ju përmes forcës së ligjit të kërkoni llogari:Ku janë dhe çfarë masash kanë marrë Bashkitë Delvinë, Finiq dhe Sarandë që lejojnë të derdhen në det këto mbetje?
Ju presim! Faleminderit!
