KQZ bllokon “Paketën e Maleve”: Mund të krijojë avantazh elektoral për qeverinë

KQZ bllokon dy nisma ligjore të Kuvendit, Celibashi: Mund të krijojnë avantazh elektoral për qeverinë

Komisioni Qendror i Zgjedhjeve (KQZ) ka rekomanduar bllokimin e dy projektligjeve të propozuara nga Kuvendi, duke argumentuar se ato mund të ndikojnë në garën elektorale dhe të krijojnë perceptimin e përdorimit të pushtetit për qëllime zgjedhore.

Kreu i KQZ-së, Ilirjan Celibashi, në vendimin e tij të datës 11 shkurt, ka kërkuar që dy nismat – projektligji “Për paketën e maleve” dhe ndryshimet në ligjin “Për tatimin mbi vlerën e shtuar” – të mos shqyrtohen në seancë plenare, pasi prekin politika të rëndësishme fiskale në një periudhë kritike para zgjedhjeve.

“Sipas Kodit Zgjedhor, në katër muajt para zgjedhjeve ndalohet miratimi i akteve me ndikim të drejtpërdrejtë në sektorin ekonomik dhe tregtar, pasi mund të cenojnë barazinë mes aktorëve ekonomikë dhe të përdoren për qëllime elektorale,” shpjegon Celibashi.

Ai thekson se ky ndalim është i domosdoshëm për të garantuar një garë të ndershme dhe për të shmangur perceptimin e favorizimit politik nga qeveria. Përjashtim nga ky rregull, sipas Kodit Zgjedhor, bëhet vetëm në rastet e gjendjeve të fatkeqësisë natyrore.

Ky vendim i KQZ-së vjen në një kohë kur debati për ndërhyrjet e qeverisë në ekonomi gjatë periudhave zgjedhore mbetet një çështje e ndjeshme në politikën shqiptare.