Konispoli shpallet Ansambël Historik – një hap i rëndësishëm drejt ruajtjes dhe promovimit të trashëgimisë kulturore
Qeveria shqiptare ka miratuar shpalljen e qytetit të Konispolit si Ansambël Arkitektonik Urban, një vendim që synon të ruajë dhe të promovojë vlerat historike dhe kulturore të kësaj qendre të jugut të Shqipërisë. Lajmi u bë i ditur nga ministri i Ekonomisë, Kulturës dhe Inovacionit, Blendi Gonxhja, i cili përmes një njoftimi publik vuri në pah rëndësinë e këtij vendimi.
Konispoli, i njohur për arkitekturën karakteristike me gurë të punuar, rrugicat me kalldrëm, lagjet me emra fisesh dhe banesat tradicionale që datojnë në shekujt XIX dhe XX, tashmë hyn zyrtarisht në hartën e zonave të mbrojtura si pasuri e trashëgimisë kombëtare.
“Në këtë qytet të vogël, por me identitet të fortë urban dhe kulturor, gjenden gjurmë të pazarit të dikurshëm dhe vendbanime antike në Qafën e Ktismave. Konispoli ka qenë një vatër e rëndësishme rezistence dhe kulture kombëtare. Ky status i ri do të ndihmojë në mbrojtjen, restaurimin dhe promovimin e qytetit përmes zhvillimit të turizmit kulturor”, u shpreh ministri Gonxhja.
Shpallja e Konispolit si ansambël arkitektonik është realizuar falë punës së Institutit Kombëtar të Trashëgimisë Kulturore dhe bazohet në Ligjin Nr. 27/2018 “Për Trashëgiminë Kulturore dhe Muzetë”. Kjo nismë synon të garantojë ruajtjen afatgjatë të pasurive të paluajtshme me vlera të veçanta kulturore e historike.
Ky vendim pritet të sjellë më shumë vëmendje dhe investime në Konispol, duke e kthyer atë në një destinacion të rëndësishëm për vizitorët që kërkojnë të zbulojnë thesaret e trashëgimisë shqiptare.
Website Saranda Web
Facebook Saranda Web
Instagram saranda.web
Youtube sarandaweb
Tiktok saranda.web
Pinterest sarandaweb
in sarandaweb
