Ish-deputetja rrëfen debatet: Demokratët të pakënaqur nga emrat e sjellë nga Tirana

Nada Meçorapaj, ish-deputete e PD në Vlorë dhe kandidate për zgjedhjet e 25 prillit në një prononcim për Abcnews.al sqaron debatet e forta mbrëmjen e sotme në kryesinë e degës së qytetit bregdetar për listat.
Meçorapaj mohoi zërat për një dorëheqje të drejtuesit politik, Bujar Leskaj, por nuk i mohoi debatet, që i cilësoi reaksione normale pas shpalljes së listave.
“Nuk ka pasur një gjë të tillë, disa reagime nga Kryesia e degës së PD Vlorë. Diskutime rreth listave, por nuk kanë arritur debatet deri në nivelin e dorëheqjes. Kaloi mbledhja me shumë mirëkuptim dhe nga nesër aktivitetet e Leskajt do të jenë aktive”.

Kryesia nuk kishte pakënaqësi? “Kryesia e degës Vlorë nuk kishte me emra konkretë, pasi lista është e mirë”. Por a është e vërtetë që ka pasur kundërshti për prurjet nga Tirana? “Kandidatët e tjerë gjithsesi e kanë një lidhje me qytetin e Vlorës.
Ky është një reaksion që cdo strukturë politike e degëve e transmeton në një moment kur dalin listat e kandidatëve për deputetë, por struktura e gjen vetën sepse ka edhe numra që e përfaqësojnë. Bujar Leskaj është një figurë multidimensionale. Gjërat u sheshuan” tha Nada Meçorapaj për Abcnews.al.