Florjana Koka: Ja projekti im për KS Butrintin

Kryetarja e Bashkisë Sarandë Florjana Koka gjatë komunikimit të djeshëm në Këshillin Bashkiak të Sarandës dhe analizës së punëve në këtë institucion, ka folur edhe për gjendjen e KS Butrinti.
Florjana Koka u shpreh se gjendja në klubin e futbollit nuk është e kënaqshme, pasi klubi financohet 100% nga Bashkia.
Por pavarësisht kësaj, ekipi ka arritur të zhvillojë aktivitetet normalisht, u shpreh kryetarja e Bashkisë.
Në lidhje me të ardhmen e ekipit, ajo u shpreh se projekti i Bashkisë Sarandë është për ngritjen e një Akademie sportive, ku do të ketë grumbullim dhe stërvitje të talenteve që në moshën 11 vjeç.
Projekti i Bashkisë synon që Bashkia të sigurojë ambientet, bazën materiale dhe pagesa të bëhen vetëm për 1 drejtor teknik dhe 3 trajnerë, ndërsa të ardhurat e tjera të sigurohen nga shitja e futbollistëve dhe nga sponsorizime të tjera.
Madje Kryetarja e Bashkisë Florjana Koka e ka hedhur topin në fushën e Opozitës, duke iu drejtuar këshilltarëve të djathtë se nëse kanë ndonjë projekt apo mendim tjetër, ta sjellin në Këshillin Bashkiak dhe ta miratojnë.
Megjithëse në qytetin e Sarandës operojnë dhjetra biznese të mëdha dhe biznese të tjera sezonale me xhiro disa milionë euro në vit, asnjë prej këtyre bizneseve nuk i ka futur ndonjëherë duart në xhep për të sponsorizuar aktivitete sportive apo  kulturore në qytetin ku ata përfitojnë këto të ardhura nga shfrytëzimi i resurseve të tij.