Detjon Vuria emërohet drejtor Sportiv i Ekipeve të Butrintit

Detjon Vuria emërohet drejtor Sportiv i Ekipeve të Butrintit

Më në fund një lajm i mirë nga futbolli në Sarandë!

Në një kohë kur sporti në Sarandë shpesh përballet me sfida të shumta – nga mungesa e investimeve te kushtet jo gjithmonë dinjitoze – vjen më në fund një lajm që rikthen shpresën dhe entuziazmin te tifozët e vërtetë: Detjon Vuria, një nga figurat më të njohura dhe të respektuara të komunitetit sportiv lokal, është emëruar zyrtarisht Drejtor Sportiv i ekipeve të futbollit të klubit Butrinti.

Ky është një moment i veçantë jo vetëm për vetë Detjonin, por edhe për të gjithë ata që e ndjekin dhe e duan futbollin sarandiot. Për më shumë se 20 vite, ai ka qenë në krye të tifozerisë së Butrintit – gjithmonë i pranishëm në çdo ndeshje, brenda dhe jashtë fushe, duke frymëzuar dhe mbështetur ekipin me një pasion që nuk është zbehur asnjëherë.

Emërimi i tij në këtë detyrë është një hap i natyrshëm dhe i merituar për dikë që ka jetuar për këtë klub. Me një përkushtim të palëkundur, me një vizion të qartë për të ardhmen e sportit, Detjon Vuria sjell në drejtimin sportiv jo vetëm përvojën e tij të gjatë, por edhe energjinë dhe besimin se gjërat mund të bëhen më mirë, më ndryshe.

Përveç rolit të tij si lider i tifozerisë, Detjon Vuria ka qenë edhe një bashkëpunëtor i ngushtë i Saranda Web në transmetimet e drejtpërdrejta të ndeshjeve të ekipit të Butrintit ndër vite. Kontributi i tij në këto transmetime ka qenë thelbësor – jo vetëm në aspektin organizativ, por edhe në afrimin e sportdashësve me ekipin e zemrës përmes ekranit, veçanërisht në raste kur mungesa e infrastrukturës mediatike e bënte të vështirë ndjekjen e ndeshjeve.

Detjoni e njeh thellësisht gjendjen reale të futbollit në qytet: nga problemet e infrastrukturës, tek sfidat me të rinjtë dhe nevojat për një sistem më të mirë organizativ. Prandaj, pritet që ai të sjellë një frymë të re në menaxhimin sportiv, duke punuar për krijimin e një baze të fortë për të ardhmen e klubit, përfshirjen e talenteve të reja dhe ndërtimin e një kulture sportive më të qëndrueshme.

Ky emërim është një shenjë shprese dhe rifillimi, një sinjal i fortë se Butrinti ka ende njerëz që e duan dhe janë të gatshëm të japin gjithçka për të.

Futbolli në Sarandë ka nevojë për pikërisht kësi figurash – të palodhur, të përkushtuar dhe me dashuri të sinqertë për sportin dhe qytetin.

Urime Detjon Vuria për këtë detyrë të re! Le të jetë ky vetëm fillimi i një rruge suksesi për Butrintin dhe për të gjithë sportin sarandiot.

Website Saranda Web

Facebook Saranda Web

Instagram saranda.web

Youtube sarandaweb

Tiktok saranda.web

Pinterest sarandaweb

in sarandaweb