Shkumbini përshkoi një rrugë të gjatë për të zhvilluar ndeshjen në stadiumin “Andon Lapa” në Sarandë dhe arriti të ndalë Butrintin në një barazim pa gola (0-0).

Pjesa e parë ishte më e hapur, ku miqtë e Shkumbinit u shfaqën më këmbëngulës në kërkim të golit, duke krijuar të paktën gjashtë raste të pastra shënimi. Muzhaqi kishte dy mundësi të mira, ndërsa edhe Pizarro, Ekango, Nexha dhe Hasani iu afruan golit, por pa sukses. Nga ana tjetër, Butrinti kërcënoi me sulmuesin e sapoardhur, Zhunior, i cili në dy raste testoi seriozisht portierin e Shkumbinit. Edhe Silva, Palasio dhe Ajala kishin raste të mira, por pjesa e parë u mbyll 0-0.

Në pjesën e dytë, Butrinti dominoi lojën dhe krijoi disa mundësi të rrezikshme. Zhunior, Onuh dhe Martins patën nga dy raste të pastra për të shënuar, por nuk arritën të gjejnë rrjetën. Momenti më dramatik erdhi në minutën e 92-të, kur Martins goditi traversën pas një krosi nga këndi. Edhe Lala dhe Onuh u afruan me golin, por pa rezultat.

Nga ana tjetër, Shkumbini u përqendrua te mbrojtja dhe u mundua të shmangë pësimin e golit. Në dy raste, Muzhaqi dhe Velaj tentuan të rrezikojnë portën e Morenos, por pa sukses.