Arrestohet në Korçë autori i dyshuar i plagosjes së 2 personave në Sarandë
Një operacion i shpejtë dhe i koordinuar mes Policisë së Vlorës, Forcës Operacionale të Drejtorisë së Përgjithshme të Policisë së Shtetit dhe Policisë së Korçës ka përfunduar me prangosjen e Ramadan Zoto, 43 vjeç, i dyshuar si autor i plagosjes së dy personave pak ditë më parë në Sarandë.
Burime policore bëjnë me dije se Zoto u lokalizua në zonën e Korçës dhe u ndalua ndërsa lëvizte me një automjet tip “Audi”. Për shkak të rrezikshmërisë së lartë që paraqiste, ndërhyrja u realizua me një aksion të befasishëm, duke e neutralizuar pa shkaktuar incidente.
Gjatë kontrollit, 43-vjeçari kishte me vete një armë zjarri pistoletë me fishek në fole, e cila u sekuestrua menjëherë. Gjithashtu, policia njoftoi se janë gjetur edhe armë të tjera zjarri, ndërsa disa persona u shoqëruan për t’u marrë në pyetje mbi ngjarjen dhe lidhjet e mundshme me të dyshuarin.
Arrestimi i Ramadan Zotos u krye për llogari të Drejtorisë Vendore të Policisë Vlorë. Hetimet pritet të përqendrohen në zbardhjen e plotë të motivit të ngjarjes, rrethanave të saj dhe në identifikimin e bashkëpunëtorëve të mundshëm.
Policia ka bërë të ditur se operacioni është pjesë e një angazhimi të gjerë për rritjen e sigurisë dhe goditjen e elementëve kriminalë që përpiqen të fshihen në zona të ndryshme të vendit.
Website Saranda Web
Facebook Saranda Web
Instagram saranda.web
Youtube sarandaweb
Tiktok saranda.web
Pinterest sarandaweb
in sarandaweb
