Dhe realisht ishte takim për t`u harruar, pasi përveç militantëve të Partisë Demokratike, në takim nuk doli asnjë qytetar, asnjë tregtar, asnjë hallexhi nga ata që preferon Basha të takojë gjatë tureve të tij. Dhe kjo për faktin e vetëm se qytetarët e kanë humbur besimin te Partia Demokratike. Hallexhinjtë u lanë në hallin e tyre dhe në mëshirën e kamzhikut të kësaj qeverie gjatë epokës së bëries shtet. Sepse kamzhiku i të bërit shtet binte vetëm në kurrizin e qytetarëve pa përkrahje, pa pyetur se cilën parti kishin votuar apo çfarë tesere kishin. Dhe opozita gjatë këtyre 3 vjetëve ka bërë sehir. Aq më keq akoma, sepse drejtuesit e Partisë Demokratike në Sarandë, jo vetëm që nuk iu gjendën pranë këtyre qytetarëve në hallin që i zuri me këtë qeveri, por ata shpreheshin se “mirë e pësojnë delet, vetë e votuan”. Ata kishin të drejtë, sepse te bizneset e tyre nuk afrohej shteti. Dhe për t`iu thënë militantëve dhe qytetareve se po bëjmë opozitë, postonin në facebook foto nga takimet me miqtë e tyre nëpër tavolina mbushur me red bull dhe gota me uiski.
Takimi i Partisë Demokratike në Sarandë u braktis nga qytetarët sepse, sepse, siç thotë populli, ç`farë të mbjellësh, atë do të korrësh. PD e Sarandës mbolli gjatë 3 vjetëve të opozitës farën e indiferencës ndaj qytetarëve dhe halleve të tyre. Duket se edhe Lulzim Basha e ka kuptuar këtë.
