Jorgo Goro takim në Shën Vasil: Këtë vit në fshat do të investohen 550 milionë

Kryetari i Bashkisë Himarë Jorgo Goro ka patur një takim me banorët e fshatit Shën Vasil për të diskutuar problematikat me të cilat përballet banorët e Shën Vasilit.
Gjatë takimit banorët kanë shprehur shqetësimet e tyre, të cilat lidhen me ujin e pijshëm, vaditjen e tokave, rrugët e brendshme të fshatit, por diskutimet kryesisht janë përqëndruar te problemet me pronat.
Gjatë fjalës së tij Jorgo Goro është shprehur mirëkuptues me shqetësimet e banorëve, por sic është shprehur ai, jo të gjitha punët zgjidhen menjëherë. Goro ka thënë se gjatë këtij viti në fshatin Shën Vasil do të investohen rreth 550 milionë lekë.
Për problemin e pronave Jorgo Goro ka thënë se kjo është një problematikë e cila ende nuk po merr një zgjidhje, por se qeveria po merret seriozisht për zgjidhjen e cështjes së pronave.
Goro duke u shprehur i sigurt se banorët do t`i japin atij besimin për drejtimin e bashkisë edhe për 4 vitet e ardhshme, ka premtuar se do të vazhdojë punën për zgjidhjen e të gjitha problematikave me të cilat përballen banorët e Shën Vasilit.