Footvolley mbërrin në Shqipëri, Ksamili pret turneun e parë ndërkombëtar – VIDEO

Ksamil: Zhvillohet Turneu i Parë Ndërkombëtar i Footvolley në Shqipëri – Sporti që Synon të Rrisë Turizmin

Këtë fundjavë u organizua në Laguna Beach në Ksamil Turneu i Parë Ndërkombëtar të Footvolley, një ngjarje sportive novatore për vendin tonë, që u zhvillua për herë të parë në Shqipëri. Ky aktivitet u zhvillua me inisiativën dhe mbështetjen e Laguna Beach Ksamil dhe mblodhi së bashku 6 ekipe nga 5 shtete të ndryshme: Brazili, Portugalia, Franca, Austria dhe Shqipëria – duke sjellë një atmosferë dinamike dhe ndërkombëtare në jugun piktoresk të vendit.

Footvolley është një sport i ri dhe i veçantë që po fiton gjithnjë e më shumë popullaritet në nivel global. Ai kombinon elementë të volejbollit me një format loje argëtues dhe spektakolar, që përshtatet në mënyrë të shkëlqyer me destinacione turistike bregdetare si Ksamil.

Organizatori i turneut, Isli Bejtaga, u shpreh se ky sport po vjen për herë të parë në Shqipëri me një mision të dyfishtë: “Synimi ynë nuk është vetëm të sjellim një sport të bukur dhe të ri për publikun shqiptar, por edhe të kontribuojmë në promovimin e turizmit përmes eventeve të tilla ndërkombëtare. Shqipëria ka potencialin e duhur për t’u kthyer në një pikë referimi për aktivitete sportive dhe kulturore me përmasa globale.”

Turneu tërhoqi vëmendjen e pushuesve vendas dhe të huaj, ndërsa ambienti miqësor dhe bashkëpunues mes ekipeve i dha aktivitetit një frymë të veçantë bashkimi dhe diversiteti kulturor.

Ky është vetëm hapi i parë drejt një rrugëtimi më të madh për Footvolley në Shqipëri, me shpresën që vitet në vijim, turneu të zgjerohet dhe të bëhet një pikë referimi e përvitshme në kalendarin turistik dhe sportiv të vendit.

KsamilI, me natyrën e tij të mrekullueshme dhe energjinë pozitive që dhuroi ky aktivitet, u shndërrua për një fundjavë në një skenë të vërtetë të sportit dhe mikpritjes ndërkombëtare.

Website Saranda Web

Facebook Saranda Web

Instagram saranda.web

Youtube sarandaweb

Tiktok saranda.web

Pinterest sarandaweb

in sarandaweb