Një çift brazilian, që ishte me pushime në Sarandë, ka kontaktuar me Saranda Web për të kërkuar shpëtimtarët e tyre, pas një aksidenti të rëndë që ndodhi më 31 korrik në kanalin e Vivarit, pranë Butrintit. Ata shprehen se u shpëtuan nga vdekja falë ndërhyrjes së menjëhershme të disa personave të panjohur që ndodheshin në vendin e ngjarjes.
“Unë dhe i dashuri im u aksidentuam në kanalin e Butrintit më 31 korrik dhe po kërkojmë njerëzit që na shpëtuan jetën, ata që na nxorën nga makina dhe infermieren që na dha ndihmën e parë. Ne pothuajse humbëm jetën dhe me të vërtetë duam të njohim ata që na shpëtuan,” shprehet gruaja 34-vjeçare, e cila kishte gjendje më të stabilizuar pas aksidentit.
Gjendja e partnerit të saj 53-vjeçar ishte kritike në momentet e para pas aksidentit, por falë ndihmës së shpëtimtarëve, ata arritën të dërgoheshin drejt Tiranës për mjekim më të specializuar.
Sot, çifti brazilian dëshiron me çdo kusht të falënderojë publikisht njerëzit që ndërhynë në ato çaste të vështira dhe që luajtën një rol vendimtar në shpëtimin e jetës së tyre. Ndihma e tyre e shpejtë dhe përkushtimi mbetet i paharrueshëm për çiftin, i cili ndodhet ende në rikuperim, por plot mirënjohje për ata që u dolën në ndihmë.
