Atentati ndaj Ari Papa nga Saranda zbardhet nga përgjimet e “Sky ECC”

Atentati ndaj Ari Papa nga Saranda zbardhet nga përgjimet e “Sky ECC”

Zbërthimi i rrjetit “Sky ECC” në Greqi: zbardhet atentati ndaj sarandiotit Ari Papa dhe dhjetëra raste trafiku droge

Detaje të reja kanë dalë nga operacioni i djeshëm në Greqi për goditjen e grupeve kriminale të përfshira në trafik droge në Shqipëri, Greqi dhe Spanjë, në atentate dhe pastrim parash. Sipas mediave greke, dosja përfshin të paktën 21 persona, ndërsa hetimet kanë nxjerrë në dritë lidhje të reja me atentati ndaj Ari Papa, 32-vjeçar nga fshati Dhivër i Sarandës.

Në atentatin e parë më 26 shkurt 2021, Papa ishte qëlluar në zonën “Stacioni i Larisës” në Athinë, ku mori dy plagë nga arma e zjarrit. Ngjarja ndodhi rreth orës 20:00, kur persona të armatosur që udhëtonin me një taksi hapën zjarr ndaj tij. Edhe pse i plagosur rëndë, ai i mbijetoi sulmit.

Më 30 maj 2021, Papa u vra teksa ndodhej në një lokal në zonën “Sepolia”. Autoritetet greke arrestuan dy persona në mars 2023, përfshirë një taksist shqiptar dhe një barist grek, ndërsa ekzekutori dyshohet se ka ardhur nga Shqipëria.

Komunikimet në “Sky ECC” dhe zbardhjet e tjera

Sistemi i koduar “Sky ECC” ka zbuluar mbi 70 raste të trafikut të drogës që përfshijnë Shqipërinë, Greqinë dhe Spanjën. Përmes këtyre komunikimeve, janë identifikuar detaje të reja për trafik droge, pastrim parash dhe bashkëpunime të grupeve kriminale. Mes rasteve të zbuluara përmendet një i ri shqiptar, i vrarë në Shqipëri nga shpërthimi i një bombe në automjetin e tij.

Kush ishte Ari Papa?

I njohur me pseudonimin “Ari i vogël”, Papa kishte një histori të ngarkuar kriminale në Greqi. Përveç tentativave për atentate ndaj tij që nga viti 2007, ai ishte i skeduar për trafik droge dhe grabitje. Ai jetonte me frikën e sulmeve, duke përdorur jelekë antiplumb dhe duke mbajtur armë. Herën e katërt, më 30 maj 2021, ai nuk i shpëtoi atentatorëve, të cilët e qëlluan tetë herë pas shpine.

Pastrimi i parave dhe përfshirja e zyrtarëve

Komunikimet e “Sky ECC” tregojnë se paratë e drogës pastroheshin përmes kompanive të makinave me qira, sistemit “Hawala” dhe basteve. Gjithashtu, në burgun e Koridhalos disa të burgosur gëzonin privilegje, përfshirë futjen e grave brenda mjediseve të sigurisë së lartë.

Vlera totale e drogës së trafikuar

Grupet kriminale përllogariten se kanë qarkulluar një sasi droge me vlerë mbi 7.2 milionë euro.

Ky zbërthim tregon se sistemi “Sky ECC” ka qenë një burim i rëndësishëm për autoritetet, duke nxjerrë në pah veprimtari kriminale që përfshijnë disa shtete dhe individë të profilit të lartë kriminal.

Website Saranda Web

Facebook Saranda Web

Instagram saranda.web

Youtube sarandaweb

Tiktok saranda.web

Pinterest sarandaweb

in sarandaweb