Komisioni i Vettingut gjen me shkelje kreun e Prokurorisë së Sarandës, Edison Ademin, duke i rrezikuar edhe shkarkimin. Sipas KPK, Ademi është shoqëruar me persona që i ka pasur nën hetim për drogë e armë e ndërsa i janë gjetur shkelje edhe në deklarimin e pasurisë. Seanca dëgjimore është shoqeruar me debate.
Shkelja e etikës dhe shoqërimi me persona që kanë qenë duke u hetuar për armëmbajtje e trafik droge rrezikojnë të penalizojnë drejtuesin e prokurorisë Sarandë Edison Ademi.
Sipas rezultateve të vettingut, me të cilat ai u ballafaqua këtë të premte, rezultoi se kishte folur në telefon me shtetasin E.M që e kishte hetuar për armëmbajtje si dhe kishte udhëtuar drejt Kosovës në 2014 me automjetin e një të hetuari për trafik droge.
Po ashtu vettingu i kishte gjetur Ademit edhe probleme me pasurinë paçka se sipas raportit të ILDKPI-s ai kishte burime për ti justifikuar por i kishte fshehur dhe kishte bërë deklarime të pasakta ndër vite.
Vetë Ademi ishte i ashpër në përgjigjet e tija duke akuzuar ILDKPI se kishte shkelur ligjin dhe kishte cënuar sigurinë e tij duke publikuar deklaratat e tij në media.
Gjatë seancës pati debate edhe për pasurinë e prokurorit Ademi, ku ai kishte deklaruar saktë një apartament në qytetin e Vlorës por sipas KPK-s kishte shkelur ligjin e konfliktit të interesit, kur kishte marrë me qira në përdorim një sipërfaqe toke në Vlorë për 99 vite nga shteti.
Edison Ademi kërkoi rihetim nga KPK por kjo kërkesë u refuzua dhe më 9 prill ora 9:15 do të jepet vendimi nëse ai do të rikonfirmohet apo shkarkohet nga detyra. Arsen Rusta/shqiptarja.com
