Sarandë, biznesi reagon i revoltuar: Bëni mëshirë për këtë qytet, po e shkatërroni!

Situata kaotike në Sarandë nuk ka të ndalur, ndërsa punimet ndërtimore vazhdojnë pavarësisht se jemi në mes të sezonit turistik. Kjo gjendje ka shkaktuar një pakënaqësi të madhe ndër radhët e biznesit lokal, të cilët shprehen të revoltuar dhe të pafuqishëm përballë kësaj situate.

Bizneset, të cilat mbështeten fuqishëm në turizëm për të ardhurat e tyre vjetore, po përballen me sfida të mëdha. Zhurmat e pandërprera, pluhuri dhe pengesat në rrugë kanë bërë që turistët të shmangin disa nga zonat më të frekuentuara të qytetit. Për më tepër, disa prej tyre kanë zgjedhur të largohen më herët nga qyteti, duke sjellë humbje të mëdha financiare për hotelierët dhe restorantet.

“Është e pamundur të zhvillosh një biznes në këto kushte,” thotë një pronar restoranti. “Ne jemi në kulmin e sezonit turistik, dhe në vend që të përfitojmë nga fluksi i turistëve, po përballemi me një situatë që vetëm sa na largon klientët. Bëni mëshirë për këtë qytet, po e shkatërroni!”

Reagimet e revoltuara të biznesit lokal vijnë pas një periudhe të gjatë pritjeje dhe durimi, por situata duket se vetëm sa po përkeqësohet. Ata kërkojnë që të paktën gjatë sezonit turistik, punimet të pezullohen, në mënyrë që turistët të kenë mundësi të shijojnë bukuritë natyrore dhe shërbimet e ofruara nga qyteti.