Rama premton: Ujë 24 orë dhe rrugë në çdo fshat – realizohen në mandatin e katërt
Kryeministri Edi Rama ka bërë së fundmi një tjetër premtim, i cili lidhet drejtpërdrejt me jetën e përditshme të qytetarëve, veçanërisht në zonat rurale.
Në komunikimin e mëngjesit në facebook, Rama ka premtuar se në mandatin e katërt qeverisës Shqipëria do të ketë ujë të pijshëm 24 orë në ditë për çdo familje, ndërsa çdo fshat do të lidhet me rrugë të asfaltuara dhe të aksesueshme.
“Mandati i katërt do të jetë mandati i përmbylljes së epokës së vjetër të mungesës së ujit të pijshëm dhe rrugëve rurale. Brenda këtij mandati, do ta realizojmë plotësisht objektivin për furnizim me ujë pa ndërprerje dhe rrugë në çdo fshat të vendit,” – deklaroi Rama, duke e cilësuar këtë si një angazhim historik.
Problemi i ujësjellësve dhe infrastrukturës rurale ka qenë ndër më të përmendurit në programet qeverisëse ndër vite, por pavarësisht disa investimeve të fragmentuara, shumë zona vijojnë të vuajnë mungesën e furnizimit me ujë dhe rrugëve të kalueshme.
Premtimi i Ramës vjen në një kohë kur shumë banorë, si në zonat rurale ashtu edhe urbane, ankohen për mungesën e ujit të pijshëm për orë të tëra, ndërsa rrugët në fshatra janë të pashtruara, të dëmtuara ose të papërfunduara.
Ndërkohë që mbështetësit e Partisë Socialiste e shohin këtë si një hap të rëndësishëm drejt modernizimit të plotë të vendit, kritikët kanë reaguar me skepticizëm, duke e cilësuar këtë premtim si një “rinovim të përhershëm të të njëjtave fjalë”, të cilat janë dëgjuar edhe në zgjedhjet e mëparshme.
Website Saranda Web
Facebook Saranda Web
Instagram saranda.web
Youtube sarandaweb
Tiktok saranda.web
Pinterest sarandaweb
in sarandaweb
