Ditën e shtunë paradite, në ambientet e hotel “Lindi” në Sarandë, u promovua libri i ri “Mozaik noti në Sarandë” i autorit Xhorxhi Vasili. Pas çeljes së veprimtarisë u shfaq një dokumentar ku personalitete të njohur të sportit shqiptar japin vlerësime për notin e Sarandës. Në mbi 500 faqe ndeshesh me emra të pafund, kampionate radhazi të të gjitha viteve, ekipe anë e kënd Shqipërisë, episode, kthesa, pse jo edhe dështime, por të shumtën suksese protagonistësh, në thelb një kujtesë e tërë kombëtare-çka në një mënyrë ose në një tjetër, e bëjnë këtë libër enciklopedinë e parë të notit shqiptar. Kjo mbase është dhe vlera unikale e librit.
Në fund presidenti i FSHN Agim Çiraku, presidenti i KOKSH Viron Bezhani, kryetarja e Bashkisë Florjana Koka dhe drejtori i klubit
shumësportësh “Butrinti” Fuat Karalliu dorëzuan medalje dhe diploma për shumë figura të shquara trajnerësh e notarësh ndër vite.
