Pas dorëheqjeve në Konispol, reagon Ergest Dule: S’ka debat, do ripërtërihemi
Konispol, 15 Korrik 2025 – Pas dorëzimit të dorëheqjeve nga drejtuesit e administratës në Bashkinë Konispol, kryetari Ergest Dule ka reaguar publikisht përmes një deklarate, duke sqaruar se situata nuk është pasojë e ndonjë debati, por pjesë e një procesi për të rritur cilësinë e shërbimeve ndaj qytetarëve.
“Ju falënderoj për interesimin dhe komentet, por ju garantoj që nuk ka asnjë debat në lidhje me shkarkimin e administratorëve. Kjo është një nisëm për ripërtëritjen e administratës, për një rritje në cilësinë dhe sasinë e shërbimeve ndaj qytetarëve”, – shkruan Dule.
Ai thekson se kushdo që ndien se mund të japë më shumë për komunitetin është i ftuar të aplikojë për pozicionet e lira pranë sekretarisë së Bashkisë Konispol.
Në deklaratën e tij, kryebashkiaku renditi disa nga punët që janë bërë deri më tani me administratën ekzistuese, duke përfshirë:
- Pastrimin e territorit,
- Rregullimin e kanaleve vaditëse dhe kulluese,
- Ndriçimin publik në 100% të territorit,
- Infrastruktura bujqësore dhe rrugë rurale,
- Trajtimin e qindra kërkesave dhe ankesave të qytetarëve,
- Asistencë në aplikime online dhe organizim të aktiviteteve kulturore,
- Investime në shkolla.
Ergest Dule pranon se jo të gjithë punonjësit janë njësoj të përkushtuar dhe thekson rolin vendimtar të drejtuesve:
“Nëse drejtuesi nuk ka pasionin, dëshirën dhe dashurinë për vendin e vet, atëherë dhe punonjësi do bëjë aq sa për t’u dukur.”
Ai fton qytetarët që të japin mendimin e tyre për performancën e administratës dhe punonjësve individualë:
“Na shkruani për çdo problematikë. Opinioni juaj është vlerësimi më i mirë për ne.”
Në përmbyllje, kryetari i Bashkisë Konispol shpreson që kjo nismë të përqafohet edhe në zyra të tjera shtetërore që i shërbejnë qytetarëve, duke e cilësuar atë si një hap të natyrshëm për përmirësimin e shërbimit publik.
Website Saranda Web
Facebook Saranda Web
Instagram saranda.web
Youtube sarandaweb
Tiktok saranda.web
Pinterest sarandaweb
in sarandaweb
