Banorët e fshatit Ninat në alarm: Hajdutët po bëjnë kërdinë çdo natë në kasolle, vidhen bagëti dhe nuk merren masa
Banorët e fshatit Ninat, në Bashkinë Konispol, po jetojnë me frikë dhe pasiguri. Prej disa ditësh, raste të njëpasnjëshme vjedhjesh të bagëtive janë raportuar nga banorët, të cilët thonë se hajdutët po veprojnë natën duke hyrë në kasollet e tyre dhe duke marrë bagëti të imta, të cilat më pas i therin pranë vendit të ngjarjes.
Një banor i fshatit, që denoncoi ngjarjen për Saranda Web, shprehet:
“Para 10 ditësh më hapën shtegun e kopshtit. Lajmërova policinë, por më thanë ‘mos e ke harruar vetë hapur, hajde s’ka gjë’… Para dy netëve dëgjova natën, manarët ishin mbledhur nën dritare. Thashë t’i trembte qeni. Në mëngjes pashë që mungonin dy krerë – i kishin marrë dhe i kishin therur te kopshti i gjitonëve.”
Pavarësisht denoncimit në polici, qytetari shprehet se nuk është marrë asnjë masë konkrete.
“E njoftova përsëri policinë, erdhi një inspektor, pastaj edhe nga Saranda. U thashë se te vendi kishte dy pleça dhe një lëkurë, por deri tani asgjë. Jam një njeri i vetëm. Këta mund të hyjnë edhe në shtëpi…”
Ai shton se nuk është rasti i vetëm:
“Më parë një fshatari i kanë vjedhur 9 krerë, vëllait tim para një nate i morën 2 krerë, dhe më parë i kanë marrë edhe dy herë të tjera nga 2 krerë.”
Banorët kërkojnë ndërhyrje urgjente nga Policia e Shtetit, patrullime gjatë natës dhe vënien në ndjekje të autorëve që po terrorizojnë zonën dhe po godasin drejtpërdrejt të vetmin burim jetese të banorëve: bagëtinë.
Website Saranda Web
Facebook Saranda Web
Instagram saranda.web
Youtube sarandaweb
Tiktok saranda.web
Pinterest sarandaweb
in sarandaweb
