Është ndarë nga jeta në moshën 79-vjeçare poeti i njohur vlonjat, Lefter Çipa, pas një beteje të gjatë me një sëmundje të rëndë. Lajmi i hidhur shënon humbjen e një prej zërave më të mëdhenj të poezisë popullore dhe të polifonisë shqiptare.
Lefter Çipa ka lënë pas një trashëgimi të pasur krijuese: 18 libra me poezi dhe mbi 1250 këngë, që e bëjnë atë një figurë të pazëvendësueshme në kulturën kombëtare. Ai njihej gjerësisht si “Princi i sotëm i polifonisë shqiptare”, duke u bërë njeriu që investoi më shumë se kushdo tjetër në ruajtjen dhe promovimin e këtij thesari shpirtëror.
Ndër librat e tij më të njohur renditen: “Bejkë e bardhë”, “Bilbilat e vendit tim”, “Shqipëri moj ballëhapur”, “Këngët e Ruzanës”, “Dheun tim përsipër mbaj”, “Për Kosovën prapë do të ngrihem”, “Kënga që tret lotin”, “Këngët e Akroqeranit”, “Princi i Dashurisë” dhe të tjerë, të cilët mbeten një pasuri e çmuar e letërsisë shqipe.
Por më shumë se librat, është muzika dhe kënga ajo që e ngjiti emrin e tij në pavdekësi. Ai është autori i një morie këngësh të paharrueshme, të cilat kanë shoqëruar breza të tërë shqiptarësh: “Bejkë e bardhë”, “Vijnë djemtë nëpër vapë”, “Nga kjo baltë e kësaj toke”, “Naim Shqipëria”, “Shqipëri pse të qan syri”, “Zoga kaçake në male”, “Këngë kurbeti”, “Vito Pëllumbesha”, “Hënëz e qiellit të gjerë”, “Moj unaza gur jeshile”, “O shokë vdekça nga kënga”, “Kënga e manushaqes”, “Zonjë e bukurisë” e shumë të tjera që tashmë janë bërë pjesë e identitetit kulturor të kombit.
Me veprën dhe shpirtin e tij krijues, Lefter Çipa do të mbetet përgjithmonë në kujtesën e shqiptarëve si një mjeshtër i madh i fjalës dhe këngës popullore.
Website Saranda Web
Facebook Saranda Web
Instagram saranda.web
Youtube sarandaweb
Tiktok saranda.web
Pinterest sarandaweb
in sarandaweb
