Miratohet me 19 vota pro marrëveshja për “Polin e Zhvillimit Turistik në Sarandë” – PLL përjashton dy këshilltarë, reagon Matilda Qurku
Në mbledhjen e Këshillit Bashkiak Sarandë 30 maj, është miratuar me 19 vota pro marrëveshja e bashkëinvestimit ndërmjet Bashkisë Sarandë dhe Fondit Shqiptar të Zhvillimit, për projektin “Poli i Zhvillimit Turistik në Sarandë”, i njohur ndryshe edhe si projekti i “Ekokampusit”.
Ndër votat pro ishin dy këshilltarë të Partisë Lëvizja e Legalitetit dhe katër këshilltarë të Partisë Demokratike, krahas këshilltarëve të majtë që mbështesin drejtimin aktual të bashkisë.
Vendimi ka sjellë reagime të forta politike, ku më i ashpri ka qenë ai i Partisë Lëvizja e Legalitetit (PLL), dega Sarandë, e cila njoftoi përjashtimin e menjëhershëm dhe të pakthyeshëm të dy këshilltarëve të saj që votuan në kundërshtim me qëndrimin e forcës politike që përfaqësojnë.
Në vijim të kësaj situate, ka reaguar edhe kandidatja për deputete e Partisë Demokratike, znj. Matilda Qurku, e cila u shpreh:
“Përshëndes vendimin e Partisë Lëvizja e Legalitetit për përjashtimin e këshilltarëve të saj pas votimit pro vendimit për Ekokampusin në Këshillin Bashkiak.
Ky është një shembull i përgjegjshmërisë politike dhe i respektimit të vullnetit të qytetarëve që duhet të ndiqet nga të gjitha partitë opozitare.
Këshilltarët që nuk i binden vendimeve politike dhe nuk mbrojnë interesin publik, nuk mund të përfaqësojnë më qytetarët.
Besnikëria ndaj votuesve dhe mbrojtja e interesit të komunitetit duhet të jenë parimet udhëheqëse të çdo përfaqësuesi lokal apo qendror.”
Miratimi i kësaj marrëveshjeje ka sjellë ndarje të thella në radhët e opozitës lokale dhe pritet të ketë jehonë edhe në zhvillimet politike të mëtejshme në Sarandë.
Website Saranda Web
Facebook Saranda Web
Instagram saranda.web
Youtube sarandaweb
Tiktok saranda.web
Pinterest sarandaweb
in sarandaweb
