Mbledhja e Këshillit Bashkiak Sarandë 30 Korrik 2025 – Miratohen panelet diellore në Heremec
Të majtë dhe të djathtë bëhen bashkë për të miratuar dhënien me qira të 60 ha tokë, të pretenduar nga banorët e Nivicës. Pas mbledhjes këshilltarët dalin nga porta e pasme, ndërsa banorët nuk u lejuan të marrin pjesë në mbledhjen e Këshillit Bashkiak dhe salla mbahej e rrethuar nga forca policore
Mes kundërshtive dhe pranisë policore, Këshilli Bashkiak Sarandë miraton dhënien me qira të 60 hektarëve për panele diellore
Këshilli Bashkiak i Sarandës ka miratuar sot, me vota unanime nga të gjithë këshilltarët e majtë dhe të djathtë, dhënien me qira të një sipërfaqeje prej 60 hektarësh tokë në zonën e Nivicës, për ndërtimin e një parku me panele fotovoltaike. Vendimi është marrë në një mbledhje të zhvilluar pa u lejuar asnjë nga banorët të merrte pjesë dhe nën masa të shtuara sigurie. Procesverbali i Mbledhjes
Zhvillimi ka ngjallur reagime të forta nga banorët e Nivicës, të cilët pretendojnë se toka është pronë e tyre dhe se çështja aktualisht është ende në shqyrtim gjyqësor. Megjithë këmbënguljen e banorëve për të marrë pjesë në mbledhje dhe për të paraqitur qëndrimin e tyre, ata nuk janë lejuar të hyjnë në ambientet ku po zhvillohej mbledhja e këshillit.
Pas përfundimit të mbledhjes, këshilltarët kanë shmangur kontaktin me banorët duke u larguar nga një derë e pasme. Ndërkohë, godina e bashkisë ku u mbajt mbledhja ka qenë e rrethuar nga forca të shumta policore.
Banorët e Nivicës kanë deklaruar se do të vijojnë rezistencën për mbrojtjen e tokës që, sipas tyre, u takon me të drejtë dhe për të cilën po ndjekin rrugën ligjore në gjykatë. Ata e kanë cilësuar vendimin si një akt të njëanshëm dhe provokues, që shkel të drejtat e pronësisë dhe i hap rrugë një konflikti të mundshëm social. Saranda Web
