Mbështillet nga misteri vrasja me prerje koke në Igumenicë

IGUMENICË: Policia e Igumenicës nuk është ende e sigurt në vërtetësinë e fjalëve të një 28-vjecari nga Shqipëria e jugut, i cili cilësohet si dëshmitari kyc i vrasjes së Bledar Terpollarit. Burime tepër të sigurta nga policia e Igumenicës, u shprehën: “Po mbajmë një shqiptar. Thotë që ka qenë present në vrasje. Sipas tij, e kanë marrë tre shqiptarë që nuk i njeh. Sipas mendimit tonë, ka marrë pjesë në vrasje por fsheh të tjerat. Është i pabesueshëm dhe thotë shumë gënjeshtra. Të premten do e cojmë në Prokurori”. Ndërkohë mediat greke shkruajnë se 28-vjecari është arrestuar vetëm për akuzën e kalimit të paligjshëm të kufirit. Sipas mediave, ai nuk ka treguar emrat e plotë të tre shqiptarëve të tjerë por vetëm pseudonimet e tyre. Policia fillimisht kishte vënë në rrethin e të dyshuarve 4 shtetas shqiptarë, të skeduar për trafik narkotikësh, por këta nuk rezultojnë të kenë lidhje me tre emrat që ka dëshmuar 28-vjecari. Në lidhje me shkakun e ngjarjes, policia është tashmë e bindur se bëhet fjalë për trafik lëndësh narkotike dhe se Bledar Terpollari ose ka fshehur një sasi droge ose nuk ka dorëzuar paratë nga shitja e saj.

.