Limioni me PPP për 35 vjet, shpallet pronari i ri

Këtë të hënë në buletinin e Agjencisë së Prokurimit Publik u njoftua shpallja e fituesve për koncesionin e portit të Limionit në Sarandë , i cili është një port ekzistues që më herët ishte dhënë me koncesion, por për shkak të ankimimeve që u ngritën dhe pretendimeve të palëve të treta, koncesioni u anulua për t’u hapur rrugë procedurës së dytë tashmë të finalizuar.

Porti i Limionit në Sarandë ka tashmë një fitues dhe është bashkimi i përkohshëm i shoqërive Kastrati dhe Edil Al, të cilët do të kenë të drejtën e shfrytëzimit të tij për 35 vite.
Një vit më parë qeveria kaloi këtë port me qira me të drejtë 20 vjet tek kompania Concord Investment , një procedurë që u kundërshtua fort nga operatorët e tregut të karburanteve ndaj të cilëve nisi të aplikohej një tarifë për të aksesuar portin ku bëhet furnizimi me karburante i jahteve.
Kompanitë që janë shpallur fituese për koncesionin e ri kanë qenë oferta e vetme për këtë koncesion dhe kanë premtuar se do të investojnë në këtë port turistik dhe shërbimi 1.3 miliardë lekë apo 10.5 milionë euro.