Lamtumirë Pëllumb Halimi – Saranda humbet një shërbyes të përkushtuar

Lamtumirë Pëllumb Halimi – Saranda humbet një shërbyes të përkushtuar

Ka ndërruar jetë pas një sëmundjeje të rëndë Pëllumb Halimi, në moshën 74-vjeçare.

Pëllumb Halimi lindi në Sarandë në vitin 1952, në një familje punëtore me origjinë nga trevat e Çamërisë. I rritur me vlerat e dashurisë për vendin, familjen dhe punën, ai u formua me sakrifica dhe përkushtim. Pas përfundimit të shkollës së mesme, ndoqi studimet në Universitetin e Tiranës, Fakultetin e Shkencave të Natyrës, ku u diplomua si inxhinier mekanik në vitin 1976.

Karrierën profesionale e nisi në Parkun e Sarandës, duke vijuar më pas në disa prej pozicioneve më të rëndësishme drejtuese në qytet. Ai ka shërbyer si drejtor i parkut automobilistik, drejtor i Portit Detar të Sarandës, drejtues i bazës mekanike në N.B. Vurgut, si dhe drejtor i shërbimeve publike në Bashkinë Sarandë. Në çdo detyrë u dallua për korrektesë, përgjegjësi të lartë dhe përkushtim ndaj interesit publik, duke drejtuar projekte zhvillimore me ndikim konkret në komunitet.

Përveç angazhimit profesional, Pëllumb Halimi ka qenë edhe një veprimtar aktiv shoqëror dhe politik. Ai është zgjedhur disa herë në strukturat drejtuese të Partisë Socialiste, ku njihej si një njeri i arsyeshëm, bashkëpunues dhe i respektuar.

Në jetën familjare, Pëllumb Halimi kujtohet si bashkëshort i denjë dhe familjar shembullor. Në vitin 1976 krijoi familje me bashkëshorten e tij, Fatmira Ahmetin, farmaciste. Nga martesa e tyre erdhën në jetë tre fëmijë: Stela, Ardino dhe Arbana, të cilët janë arsimuar dhe formuar me përkushtim, duke ndjekur rrugë të denja në jetë. Edhe pse sot jetojnë në Tiranë dhe në Shtetet e Bashkuara të Amerikës, lidhjet e tyre me Sarandën dhe vendlindjen kanë mbetur të pandërprera.

Familja, të afërmit dhe miqtë trashëgojnë jo vetëm emrin dhe kujtimin e tij, por edhe vlerat e një njeriu të thjeshtë, të sinqertë, të përkushtuar ndaj familjes, punës dhe njerëzve. Emri i Pëllumb Halimit mbetet i lidhur ngushtë me shërbimin publik dhe gjurmët që ai ka lënë në Sarandë, Konispol, Delvinë e më gjerë.

Familja pret ngushëllime në shtëpinë funerale duke filluar sot nga ora 10:00.
Përcjellja për në banesën e fundit do të bëhet ditën e diel, më 8.02.2026, në orën 10:00, në Limjon.

Saranda humbet një shërbyes të përkushtuar të saj, ndërsa kujtimi dhe kontributi i Pëllumb Halimit do të mbeten pjesë e memories qytetare.

🕊️ Ngushëllime familjes dhe të afërmve.