Fjalët e fundit të viktimës ‘Më vrave o qen…’!

Policia ka marrë në pyetje familjarët e Agron Xhezairit për të mësuar më shumë për autorët, që e ekzekutuan me armë zjarri mbrëmjen e së dielës në hyrje të banesës së tij.
Në momentet e fundit ka qenë pranë kunata e tij, e cila ka dëshmuar në polici se fjalët e fundit të 53-vjeçarit kanë qenë ‘Më vrave o qen!’.
Agron Xhezairi është qëlluar disa herë me automatik te dera e shtëpisë. Ai doli për të zgjidhur qenin e tij dhe në këtë moment autori ka qëlluar disa herë me automatik.
Pavarësisht se 53-vjeçari tentoi të futej brenda në shtëpi, ai nuk ka mundur pasi autori  e ka qëlluar përsëri.
53-vjeçari Agron Xhezairi është vrarë me breshëri arme, ndërsa pista kryesore e hetimeve është që vrasja mund të jetë bërë për hakmarrje, pasi djali i tij është personi kryesor i dyshuar për vrasjen e Aleksandër Bardhit më 24 shtator në fshatin Shëndëlli.
Për vrasjen e Aleksandër Bardhit janë arrestuar Dhimitër Ciko 20-vjeç dhe Amarildo Lame 18-vjeç, ndërsa policia ka shpallur në kërkim edhe 20-vjeçarin Albi Xhezairi.