Një sasi prej 20.2 kg lënde narkotike e futur në 18 pako u zbulua nga autoritetet kufitare greke në një autobus që kryente itinerarin Sarandë-Athinë dhe anasjelltas. Droga u gjet natën duke gdhirë dita e sotme në një çantë të zezë, fshehur pas televizorit, brenda autobusit, gjatë kontrollit që ushtroi policia greke në vendkalimin kufitar të Kakavijës në territorin e Greqisë. Për këtë ngjarje u shoqërua shoferi i autobusit, A K., nga Delvina. Autobusi u raportua të ishte i një linje që operon në Sarandë. Përfaqësuesi i kësaj kompanie mohoi që autobusi të ishte pronë e tij. Ai tha se disa linja përdorin emrin e kompanisë së tij dhe duke u ndalur tek autobusi i kapur me drogë, tha se ai ishte një autobus me targa greke që ishte marrë me qira nga KTEL i Janinës, kompania shtetërore greke e transportit ndërurban. Në fotot shikoni momentet kur autobusi me pasagjerë kryesisht shqiptarë, iu nënshtrua kontrollit të policisë kufitare greke.
.
