Banorët e Nivicës Ndërpresin Ceremoninë e Planifikuar në Kakome, Ministrja Balluku Detyrohet të Tërhiqet
Sot, punonjësit e Bashkisë Sarandë dhe asaj Himarë u angazhuan që në orët e para të mëngjesit për të pastruar ambientin pranë ish repartit ushtarak në Kakome. Arsyeja për këtë aktivitet të papritur ishte vizita e paralajmëruar e Ministres së Infrastrukturës dhe Energjisë, Belinda Balluku, e cila pritej të deklaronte fillimin e punimeve në këtë zonë të shumëdiskutuar.
Lajmi për ardhjen e ministres nuk kaloi pa u vënë re nga banorët e Nivicës, të cilët pasi mësuan për këtë ceremoni, vendosën të reagojnë menjëherë. Banorët që ndodheshin në atë moment në Nivicë u nisën drejt Kakomes për të ndërprerë ceremoninë, duke e bërë të qartë kundërshtimin e tyre të fortë ndaj projekteve që prekin këtë zonë.
Sipas burimeve tona, Ministrja Balluku u përpoq të mbërrinte në Kakome me skaf nga deti, por plani i saj u ndërpre kur vërejti se niviciotët ishin të pranishëm dhe e prisnin te moli. Përballë këtij skenari, ajo u detyrua të tërhiqej, duke mos realizuar programin e saj të planifikuar.
Banorët e Nivicës, të vendosur dhe të revoltuar, u shprehën se janë të përgatitur të shkojnë deri në fund për të mbrojtur tokën e tyre. “Nuk na kanë lënë asnjë hapësirë tjetër për t’u mbrojtur, veç vdekjes tonë,” deklaruan ata. “Kur t’i vijë ora, edhe vdekjen në dispozicion të Kakomesë dhe nderit tonë do t’a vendosim.”
Ky akt i vendosur i banorëve tregon edhe një herë vendosmërinë e tyre për të mbrojtur të drejtat dhe trashëgiminë e tyre kundër çdo ndërhyrjeje që ata e konsiderojnë të padrejtë.
Website Saranda Web
Facebook Saranda Web
Instagram saranda.web
Youtube sarandaweb
Tiktok saranda.web
Pinterest sarandaweb
in sarandaweb
