Banorët e Fshatit Fitore në Finiq përballen me mungesë uji prej tre ditësh

Banorët e Fshatit Fitore në Finiq përballen me mungesë uji prej tre ditësh

Banorët e fshatit Fitore në Finiq kanë tre ditë që nuk furnizohen me ujë të pijshëm, duke përjetuar vështirësi të mëdha për plotësimin e nevojave bazike të përditshme. Sipas tyre, problemi qëndron tek mungesa e furnizimit të depozitës kryesore të fshatit.

Banorët janë drejtuar menjëherë për ndihmë në bashkinë Finiq, por atje kanë marrë përgjigje se kjo çështje është në kompetencë të Ujësjellësit të Sarandës. Ndërkohë, për të sqaruar situatën, Saranda Web ka kontaktuar me zyrtarë të Ujësjellës Sarandë. Ata kanë pranuar se janë në dijeni të problematikës dhe kanë premtuar se çështja do të zgjidhet brenda ditës së sotme.

Në pritje të zgjidhjes, banorët shprehin shqetësimin e tyre për situatën, duke theksuar se mungesa e furnizimit me ujë, veçanërisht në këto ditë të nxehta vere, është një problem serioz që kërkon reagim të menjëhershëm nga institucionet përgjegjëse. Saranda Web do të vazhdojë të monitorojë situatën dhe të informojë banorët për çdo zhvillim të ri.