Shkak është konkurrenca e pandershme prej të cilës ata po dëmtohen nga ana financiare.
Madje si pasojë e këtij fenomeni, në orët e para të mëngjesit të sotëm, ka pasur përplasje mes shoferëve grevistë dhe atyre që kërkonin të përfitojnë nga konkurrenca e pandershme. Sipas burimeve policore, janë shoqëruar për në Komisariatin e Policisë së Gjirokastrës, tre prej personave të përfshirë në konflikt.
Grevistët kanë kërkuar përmbushje të kërkesave të tyre pasi në të kundërt, kanë paralajmëruar përshkallëzim të mëtejshëm të protestës. Sipas tyre, Ministria e Transporteve ka lejuar deformimin e tregut të udhëtarëve duke i’u dhënë leje firmave klienteliste fantazmë që të operojnë në linjat ndërqytetëse të Gjirokastrës.
Të gjendur në kushte të tilla, banorët e Qarkut të Gjirokastrës, ngelen pa zgjidhje për të udhëtuar në destinacione të ndryshme pasi kjo grevë do të vijojë deri në përmbushjen e kërkesave të shoqatave të transportit të udhëtarëve që operojnë në rajonin jugor.
Nga ana e saj Policia Rrugore, nuk ka ndërhyrë vecse ka vëzhguar në distancë protestën. Shoferët kanë paralajmëruar grevë urie si masë ekstreme.
Me të njëjtat probleme përballen edhe agjensitë e udhëtarëve të Sarandës, të cilat kanë bërë herë pas here denoncime për këto fenomene, por që për të cilat nuk kanë gjetur zgjidhje dhe po shikojnë mundësinë për të filluar protestat duke paralizuar transportin e udhëtarëve.
