Vazhdon Skandali: Mbetjet spitalore ne kazane mbeturinash

Vijon skandali me hedhjen e mbetjeve spitalore në koshat e plehrave, në qytetin e Sarandë. Pavarësisht se ekzistojnë disa kompani të licencuara nga Agjencia Kombëtare e Mjedisit, të cilat kontraktohen nga spitalet shtetërore dhe private për t’i tërhequr mbetjet në incineratorët e ngritur, realiteti është tepër zhgënjyes, deri në kaotik, duke rrezikuar seriozisht shëndetin e qytetarëve.
Saranda Web denoncoi skandalin dy ditë më parë, me foto dhe video, ndërsa ka siguruar video të reja, ku shihet se mbetjet spitalore janë hedhur sërish në koshat e mbeturinave, që ndodhen në rrugët e qytetit jugor.
Nga videot shihet se janë hedhur mbetje të ndryshme, si shiringa, doreza apo dhe materiale të tjera, që përdoren nga personeli mjekësor, ndërsa në vendngjarje ka mbërritur dhe policia.
Kryeinspektori i Mjedisit, Ilinden Maze, deklaroi për media se ka dalë në terren dhe po verifikon nga afër mbetjet spitalore. ‘Jam në terren dhe po verifikoj situatën. Jemi në kërkim të autorëve, që të bëjmë cilët janë dhe të përgjigjen para ligjit”, tha Maze.