Shkundet Vendi: Priten arrestime edhe në Sarandë

Pas “shkrirjes” së Bashkisë së Lezhës ditën e djeshme kur u arrestua kryebashkiaku i PD Fran Frrokaj dhe u lëshuan 23 urdhër-arreste për zyrtarë të tjerë të përfshirë në një skemë mashtrimi me pronat në bregdet, aksione të tjera e arrestime të bujshme priten në vend.
Rreth 50 zyrtarë të lartë, të cilët janë përfshirë në aferën korruptive të tjetërsimit të pronave në bregdet pritet që të përballen me drejtësinë.
Abuzimet me pronat, shkeljet e ligjit , tjetërsimi i titujve të pronësisë por edhe dhënia e lejeve të ndërtimit janë pikat ku zyrtarët e prokurorisë kanë gjetur shkeljet e ligjit.
Burime zyrtare nga prokuroria kanë thënë për CNA.al se janë prerë gati 50 flet-arreste, të cilat përfshijnë specialistë të zyrave të regjistrimit të pasurive, zyrtarë të lartë të bashkive, drejtorë urbanistikë, por edhe drejtues të lartë të Hipotekave dhe bashkive përkatëse nga Durrësi deri në Sarandë.
Nga i njëjti burim theksohet se gjithçka është hetuar në lidhje me tjetërsimin e pronave në mënyrë të paligjshme në zonat bregdetare.