Rama për zaptimin e hapësirave publike: Hiqini trarët për parkime e tendat nëpër lokale, do përballeni me gjoba e ndjekje penale

Rama ultimatum për hapësirat publike: Hiqini trarët dhe tendat brenda 2 javësh, ndryshe gjoba dhe ndjekje penale 

Kryeministri Edi Rama ka dhënë një mesazh të prerë dhe të qartë për të gjithë ata që kanë zaptuar hapësira publike, qofshin biznese apo individë: kanë vetëm dy javë kohë për t’i liruar, përndryshe do të përballen me masa të ashpra administrative dhe penale.

Deklarata u bë gjatë një takimi me deputetët në Tiranë, pjesë e një serie mbledhjesh në qarqet kryesore të vendit, përfshirë Vlorën, Durrësin, Fierin dhe Elbasanin, ku qeveria po adreson shqetësimet e qytetarëve me fokus të veçantë te hapësirat publike.

“Është bërë e padurueshme për komunitetet urbane, sidomos në qytetet e mëdha, zaptimi dhe uzurpimi i hapësirave publike nga bizneset me tenda dhe individët me trarë për parkim. Ky është një abuzim i hapur që duhet të marrë fund,” tha Rama.

Ai theksoi se strukturat vendore kanë dështuar në zbatimin e ligjit dhe paralajmëroi se periudha e mosveprimit ka përfunduar. “Ka ardhur koha që të hiqen të gjitha pengesat që pengojnë lirinë e lëvizjes dhe jetën komunitare në blloqet e banimit,” u shpreh kryeministri.

Një vëmendje të veçantë Rama i kushtoi edhe abuzimit nga ndërtuesit dhe pronarët e bizneseve që, pas ndërtimit të pallateve apo hapjes së lokaleve, kanë zënë edhe ambientet përreth si pronë private. “Nuk mund të lejohet që hapësira publike të trajtohet si pronë private për përfitime personale, duke vendosur trarë për parkim dhe duke i marrë para banorëve,” theksoi ai.

Kryeministri paralajmëroi gjoba të menjëhershme dhe ndjekje penale për shkelësit që nuk reagojnë brenda afatit dyjavor. Ai gjithashtu bëri apel për rikthimin e autoritetit të pushtetit vendor në menaxhimin e hapësirave publike dhe përfundimin e abuzimeve që cënojnë jetën urbane dhe dinjitetin qytetar.

Website Saranda Web

Facebook Saranda Web

Instagram saranda.web

Youtube sarandaweb

Tiktok saranda.web

Pinterest sarandaweb

in sarandaweb