Rama i prerë: Nuk do ketë legalizime për ndërtimet pas vitit 2020 – Vetëdeklarimet për qëllime fitimi, të pavlefshme
Kryeministri Edi Rama ka dhënë një mesazh të qartë për të gjithë ata që kanë ndërtuar pa leje pas vitit 2020 për qëllime fitimi: këto objekte nuk do të legalizohen dhe çdo vetëdeklarim do të konsiderohet i pavlefshëm.
Në një takim me deputetë dhe drejtues të Bashkisë së Tiranës, Rama theksoi se procesi i legalizimeve ka përfunduar zyrtarisht në vitin 2020 dhe çdo përpjekje për ta keqpërdorur këtë proces për përfitim personal do të ndëshkohet.
“Legalizimi është kthyer në një abuzim nga individë apo subjekte që për qëllime fitimi zaptojnë hapësira publike, pastaj bëjnë vetëdeklarime për të hyrë në procesin e legalizimit. Por ky proces me ligj ka përfunduar në vitin 2020. Çdo objekt i ndërtuar pas këtij viti nuk do legalizohet”, u shpreh Kryeministri.
Ai shtoi se legalizimet nuk do të aplikohen për godina apo ndërtesa të ngritura për përfitim ekonomik, dhe paralajmëroi anulimin e çdo legalizimi të tillë të miratuar deri më sot.
“Nuk jemi këtu për të diskutuar rastet e familjeve që kanë ndërtuar një shtëpi për të futur kokën. Por kur bëhet fjalë për ndërtime për fitim, interesi publik do të prevalojë dhe nuk do të pranohet asnjë copë letre që pretendon përfshirje në proces legalizimi,” tha Rama.
Deklarata e tij vjen në një kohë kur shqetësimet për ndërtimet informale në qytete të mëdha, si Tirana, janë shtuar, duke u kthyer në një sfidë për planifikimin urban dhe administrimin e territorit.
Website Saranda Web
Facebook Saranda Web
Instagram saranda.web
Youtube sarandaweb
Tiktok saranda.web
Pinterest sarandaweb
in sarandaweb
