Publikohet lista e zgjedhësve, apeli për qytetarët: Rinovoni Kartat e Identitetit

Publikohet lista e zgjedhësve, apeli për qytetarët: Rinovoni Kartat e Identitetit

Ministri i Punëve të Brendshme, Ervin Hoxha, njoftoi të hënën se 3,721,116 shtetas shqiptarë do të kenë të drejtë të votojnë në zgjedhjet e përgjithshme të datës 11 maj 2025. Në një deklaratë për mediat, ai bëri thirrje për qytetarët që të rinovojnë kartat e identitetit dhe pasaportat, duke theksuar rëndësinë e dokumenteve të vlefshme për ushtrimin e të drejtës së votës.

“50.5% e zgjedhësve janë meshkuj, ndërsa 49.5% janë femra,” deklaroi ministri Hoxha, duke shtuar se lista e zgjedhësve paraprake përjashton 4,536 shtetas të moshës mbi 100 vjeç. Për t’u përfshirë në listë, këta shtetas duhet të paraqiten pranë zyrave të Gjendjes Civile.

Shqiptarët jashtë vendit votojnë për herë të parë

Një risi në zgjedhjet e ardhshme është e drejta e votës për shqiptarët që jetojnë jashtë vendit. Ministri sqaroi se këta shtetas do të mund të votojnë pa qenë e nevojshme të udhëtojnë drejt Shqipërisë. Megjithatë, numri i tyre mbetet ende i paspecifikuar.

Lista paraprake e zgjedhësve do të bëhet publike më 9 mars 2025, dhe qytetarët do të kenë 48 orë kohë për të konfirmuar vendndodhjen e tyre të votimit, brenda apo jashtë vendit.

Masat për të shmangur problematikat

Ministri Hoxha njoftoi se një udhëzim i ri tashmë u lejon qytetarëve të aplikojnë për dokumente identifikimi edhe në zyrat konsullore jashtë vendit. Ai theksoi nevojën që kryetarët e bashkive të angazhohen për përmirësimin e infrastrukturës së qendrave të votimit, duke adresuar qendrat jashtë limiteve me më shumë se 1,000 ose më pak se 300 zgjedhës.

Pastrimi i listave dhe qendrat e veçanta të votimit

Në bashkëpunim me Ministrinë e Drejtësisë, është miratuar një akt për të pastruar listat nga shtetasit që ligji për dekriminalizimin përjashton nga e drejta e votës. Po ashtu, janë planifikuar qendra votimi në institucionet e vuajtjes së dënimit, duke garantuar të drejtën e votës për personat që plotësojnë kriteret ligjore.

Apeli për qytetarët mbetet i qartë: rinovimi i dokumenteve është i domosdoshëm për të shmangur pengesat në ushtrimin e një të drejte themelore siç është vota.

Website Saranda Web

Facebook Saranda Web

Instagram saranda.web

Youtube sarandaweb

Tiktok saranda.web

Pinterest sarandaweb

in sarandaweb