Pas denoncimit të familjarëve nëpërmjet Saranda Web, vjen reagimi i menjëhershëm: Trupi i Isa Rexhepaj dërgohet për autopsi drejt Tiranës
Pas denoncimit publik të familjarëve të Isa Rexhepaj përmes Saranda Web, autoritetet kanë reaguar menjëherë duke bërë të mundur nisjen e trupit të të ndjerit drejt Tiranës me ambulancë, për kryerjen e autopsisë.
Isa Rexhepaj, 64 vjeç, u gjet i vdekur pas katër ditësh mungesë, ndërsa familjarët denoncuan se trupi i tij ishte lënë në kushte të papërshtatshme në morgun e Sarandës dhe kishte nisur të dekompozohej. Sipas tyre, neglizhenca e institucioneve përkatëse, përfshirë Prokurorinë dhe shërbimin e morgut, ka vonuar pajisjen me aktet e nevojshme për autopsinë dhe transportin.
Të shqetësuar dhe të indinjuar, të afërmit e të ndjerit protestuan këtë mesditë përpara Komisariatit të Policisë në Sarandë, duke kërkuar zbardhjen e shpejtë të rrethanave të vdekjes dhe trajtimin me dinjitet të trupit të të afërmit të tyre.
Vetëm pas publikimit të ngjarjes nga Saranda Web dhe presionit mediatik, autoritetet ndërhynë duke organizuar transportin e trupit drejt Institutit të Mjekësisë Ligjore në Tiranë.
Ngjarja ka ngritur sërish shqetësimin për funksionimin e shërbimeve ligjore dhe shëndetësore në rastet e ndjeshme si ky, ku procedurat e ngadalta dhe mungesa e koordinimit shtojnë dhimbjen e familjarëve dhe nxisin zemërim të ligjshëm publik.
Website Saranda Web
Facebook Saranda Web
Instagram saranda.web
Youtube sarandaweb
Tiktok saranda.web
Pinterest sarandaweb
in sarandaweb
