Nëse nuk do të ishte ky njoftim i shkurtër vendosur në faqen fb të bashkisë, asnjë prej qytetarëve të Sarandës nuk do të dinte se ditën e nesërme Këshilli Bashkiak i qytetit merr vendimin më të rëndësishëm të vitit, atë të miratimit të buxhetit për 2018.
Sipas ligjit, këshilltarët bashkiakë e kanë patur projekt-buxhetin përpara 5 ditësh, ndërsa ky projekt-buxhet, po sipas ligjit, këto ditë është diskutuar në komisionet e Këshillit Bashkiak.
Nga ana e tyre qytetarët nuk kanë asnjë informacion se cfarë përban projekt-buxheti që do të diskutojnë dhe miratojnë këshilltarët bashkiakë ditën e neserme, kjo pasi me qytetarët nuk është mbajtur asnjë konsultim.
Por ajo që bën përshtypje është edhe fakti që deri tani as opozita nuk ka shprehur në publik apo media ndonjë vërejtje ndaj projektit që bashkia ka dërguar në Këshillin Bashkiak, cka të bën të dyshosh për një dakordësi në heshtje, ashtu siç janë miratuar gjatë kohëve të fundit edhe shumë vendime të tjera në kurriz të qytetit dhe qytetarëve.
