Dino Didani publikon “Lulet e Dimrit”

Autori Dino Didani ka nxjerrë në qarkullim vëllimin e tij më të ri poetik me titull “Lulet e Dimrit”, botuar në fillim të vitit 2026 nga shtypshkronja 2.M.

Ky është libri më i fundit në krijimtarinë e Dino Didanit dhe vjen pas botimeve të mëparshme në poezi dhe prozë.

 

 

“Lulet e Dimrit”, libri i ri nga Dino Didani

 

“Lulet e Dimrit” përfshin rreth 300 faqe dhe përmbledh poezi të shkruara në periudha të ndryshme, të përqendruara kryesisht te përjetimi personal, malli për vendlindjen dhe temat kombëtare.

Në këtë vëllim, Dino Didani trajton: Emigracionin dhe largësinë nga Atdheu, Kujtimet dhe përvojat personale, Figura historike shqiptare, Dashurinë dhe reflektimin mbi kohën.

.

Emigracioni zë një vend të rëndësishëm në libër, duke qenë pjesë e përvojës jetësore të autorit prej më shumë se tre dekadash në SHBA.

Në një nga poezitë ai shkruan:

“Mërgimi nuk është një udhëtim turistësh,
Është plagë që ecën në një tokë të huaj,
Çdo mërgimtar mbart në dhe tjetër trupin
Sepse shpirtin e ka lënë në pragun e vendlindjes.”

.

Dino Didani ka lindur në Janjar. Ai ka kryer studimet e larta për Veterinari në Universitetin e Tiranës dhe më pas ka punuar në administratën shtetërore.

Pas viteve 1992, u largua nga Shqipëria, fillimisht drejt Greqisë dhe më pas në SHBA, ku jeton prej shumë vitesh në Çikago. Përvoja e emigrimit dhe lidhja me vendlindjen janë elementë të pranishëm në krijimtarinë e tij.

 

Stili i Dino Didanit në këtë vëllim

 

Në “Lulet e Dimrit”,  përdoret një strukturë klasike të vargut dhe një gjuhë të drejtpërdrejtë. Poezitë ndërtohen mbi përjetime konkrete dhe shpesh përfshijnë elemente të natyrës si metaforë për gjendje emocionale.

.

Në poezinë “Vdekja e trimit”, për shembull, përdor imazhe të forta për të përshkruar dhimbjen dhe humbjen:

“Qielli u zbardh dhe retë lëshuan borë
Duke ftohur plagët, që mortja hapi sot,
Ndofta dhimbja, si çirrte njerëzit me thonj
Po sytë po i kthente, në prrenj me lot.”

.

Një botim i ri në krijimtarinë e Dino Didani

 

Përpara “Lulet e Dimrit”, autori ka botuar:

• “Një jetë në shërbim të Kombit” (2007, monografi – bashkëautor)
• “Gjuha e zogjve” (2008, poezi)
• “Fshatari” (2023, roman)

Me këtë botim të ri, Dino Didani vijon aktivitetin e tij letrar me një përmbledhje që ndërthur motive personale me tema kombëtare.

“Lulet e Dimrit” është tashmë në qarkullim dhe i shtohet listës së librave të Dino Didanit. Vëllimi i drejtohet lexuesve që ndjekin krijimtarinë e autorit dhe poezinë shqipe bashkëkohore. Saranda Web

 

---