Banorja e Konispolit denoncon ndërtimin e një stalle në lagjen e saj: “Institucionet nuk japin zgjidhje”
Një banore e Konispolit ka ngritur shqetësimin e saj lidhur me lejimin e ndërtimit të një stalle në një zonë të banuar të qytetit. Sipas denoncimit të saj, ajo është përpjekur të gjejë një zgjidhje pranë institucioneve shtetërore, por pa sukses.
“Kam bërë ankesa në bashki dhe në polici, por askush nuk ka marrë masa. Si është e mundur të lejohet ndërtimi i një stalle në një zonë ku banojnë familje?
Nuk është e drejtë që Bashkia e Konispolit lejon këtë vetëm për një votë, ndërsa ne jemi të detyruar të largohemi nga shtëpitë tona,” shprehet ajo në ankesën e saj dërguar në Saranda Web.
Banorja kërkon ndërhyrje urgjente nga autoritetet për të parandaluar ndërtimin e kësaj stalle, duke argumentuar se një strukturë e tillë në një zonë të banuar dëmton cilësinë e jetës dhe është në kundërshtim me interesin e komunitetit.
Ajo bën apel që institucionet përgjegjëse të marrin masa dhe të ndalojnë këtë ndërtim që, sipas saj, po favorizohet padrejtësisht.
